Farto de peleyas d'otri,
cuan a luita se remata
atro campo de batalla
más difizil a yo aguarda.
Si, muller, a la fin torno ta casa
pos tu yes a mía unica patria.

Fastiau de muerte y sangre,
ta ferir con a mía berra
nomás quiero a tuya guerra
si tu la quiers prenzipiar;
dixaré o rancuello si falta
ta ficar a mía rasmia an que te calga.

A seteguera que porto
l'afogare n'o deseyo
que m'aplena cuan te beigo
anque tu me digas "fui".
Fui que no, no te fará o morro clo
si no fas buenas trazas ta l'amor.

Cuan arribo a o canto tuyo,
per gran que sia l'escamallo,
no trobo millor treballo
que afogar-me n'o bercher
amagau / que ruxia la tuya fuen
a que tiens n'ixe güerto tan calién.

O licor más espritoso
beberé d'a tuya boca,
n'importa igual a redota
ye reblar debán de tú
y meter as mías armas a's peus tuyos
o broquel, o cultro y o tieso chuzo.

Si no tiengo as armas prestas
u si yo no doi a mida,
tendré mui bien merexida
a carraña más salbache:
tornaré con pazenzia a parar cuenta
d'a rezeta ta apañar o frechinache.

Si un almugábar zereño
en ye de berdá, no escusa
l'afalago y a suabura
que emplega ta conquistar;
ixa si que ye una batalla fura
y a que diz si ye un ombre con balura.

Y si a murria me burniase
u si me benze a galbana,
tu me podrás fer a tana
contino, terne que terne;
a lizión que en a guerra y en l'amor
cal quitar: que nomás qui rebla pierde.

See also:
JustSomeLyrics
38
38.32
Ken Ring Privat Fest Lyrics
מרסדס בנד מלך הראפ של ירושלים Lyrics